Оқушыға Оралда ота жасалады
Атырауда №36 мектептің 11-сынып оқушылары мектеп әжетханасында 10-сынып оқушысын соққыға жыққан. Салдарынан жасөспірім есінен танып қалған. Бұл туралы Azattyq Rýhy Ақ Жайық порталына сілтеме жасап хабарлайды.
Мектепте жәбірленушіге көмек көрсете алмады, өйткені жарақаты ауыр еді, кәсіби дәрігерлердің көмегі қажет болды.
«Жәбірленуші 25 сәуірде сағат 17:00 шамасында облыстық балалар ауруханасының қабылдау бөліміне түсті. Ол лор бөлімшесіне жатқызылды. Науқасқа шұғыл хирургиялық көмек қажет еместігіне және бізде қазір жақ-бет хирургиясы маманының жоқтығына байланысты науқасты Батыс Қазақстан облыстық ауруханасының мамандарына жіберу ұйғарылды. Оның диагнозымен пациентті 7-10 күн ішінде жоспарлы түрде операцияға қабылдауы тиіс еді. Алайда бүгін сағат 12-де ата-анасы ұлын қолхат жазып, ұшақпен Оралға алып кетті. Облыстық балалар ауруханасы қазіргі таңда жақ-бет хирургиясы маманын даярлап жатыр, ол биылдан бастап жұмысқа кірісуі тиіс», – деп хабарлады облыстық балалар ауруханасының директоры Нұрқабыл Айтмұхамбетов.
Атырау облыстық полиция департаменті бұл факті бойынша ҚР Қылмыстық кодексінің 107-бабымен («Денсаулыққа қасақана орташа ауырлықтағы зиян келтіру») сотқа дейінгі тергеу жүріп жатқанын хабарлады.