«Болашақ» бағдарламасының тізіміне 40 жаңа мамандық кірді

Azattyq Rýhy

Биыл шетелдік ЖОО-да білім алуға арналған басым мамандықтар тізіміне 92 мамандық кірді

«Болашақ» бағдарламасының тізіміне 40 жаңа мамандық кірді
Фото: depositphotos.com

Биыл еңбек нарығының трендтерін талдаудың нәтижесінде «Болашақ» бағдарламасының басым мамандықтар тізіміне инновациялар, жаңа технологиялар, медицина және индустриялық инженерия, жаратылыстану ғылымдары саласындағы 40 жаңа мамандық қосылды, деп хабарлайды Azattyq Rýhy.

«Халықаралық бағдарламалар орталығы» АҚ баспасөз қызметінің мәліметінше, осы ретте 17 мамандықтың атаулары кеңейтіліп, бұрыннан бар мамандықтар қатарына қосылса, ал 23-і жаңа мамандықтар ретінде енгізіліп отыр. Жалпы алғанда, басым мамандықтардың тізімі техникалық бағыттағы мамандықтармен 30%-ке кеңейтілді. 

«Халықаралық бағдарламалар орталығы басым мамандықтарды анықтау үшін жоғары және жоғары оқу орнынан кейінгі білімі бар кадрларға қажеттілігі туралы мемлекеттік органдар мен ұйымдардан келіп түскен 70-ке жуық өтініміне талдау жасады. Кадрлық нарықтың орта мерзімді болжамы ескерілді. Мемлекеттік органдар, ЖОО, ғылыми орталықтар, индустрия және бизнес өкілдерінің қатысуымен сараптамалық кездесулер өткіздік», – делінген мәліметте. 

Биыл шетелдік жоғары оқу орындарында білім алуға арналған басым мамандықтар тізіміне жалпы академиялық оқуға арналған 92 мамандық және тағылымдамадан өтуге арналған 158 мамандық кірді. Тізімді «Халықаралық бағдарламалар орталығы» АҚ ресми сайтынан қарауға болады.

×
Бұл желілік ресурстың ақпараттық өнімдері 18 жастан асқан адамдарға арналған.