Су тасқыны: БҚО-ның бірнеше ауданында жағдай күрделі болып тұр

Батыс Қазақстан облысында төтенше жағдай жарияланған аудандардан өзге елді мекендерге де қарғын судан қауіп бар. Оның ішінде Деркөл, Шежін өзендері кесіп өтетін Тасқала ауданындағы ахуал алаңдатады. Тасқынның алдын алу шараларына көрші облыстан құтқарушылар жұмылдырылды, деп хабарлайды Azattyq Rýhy тілшісі «Хабар 24» арнасына сілтеме жасап.

Облыстың батыс бетіндегі ауданда жыл сайын қар қалың түседі. Ертерек қамданбаса, екі өзен әп-сәтте арнасынан асып кетуі мүмкін. Деркөлдің екі жағын бойлай орналасқан Тасқала ауылында тасқын қаупі биыл да төніп тұр.

Ауылдың ішінде үш бағыттан тоғысатын каналдар мен бір бөгет бар. Каналдар өзенге құяды. Гидронысандарда қазір су толассыз ағып жатыр. Былтыр арналар тазартылып, қосымша құбырлар орнатылыпты.

Облыста бір мезетте-ақ бірнеше елдімекенде табиғи апат болған кезде арнайы техника мен еңбек күшінің жетіспейтіні айқын сезілді. Аймаққа Атырау мен Маңғыстаудан құтқару жасақтары көмекке келді. Солардың жартысы Тасқала ауданына жұмылдырылған. Олар көшелерді қар суынан жедел тазарту жұмыстарын жүргізіп жатыр.

«Біз 2 сәуірде келдік. Ол кезде жағдай расымен күрделі еді. 400-ден астам тұрғын үй мен шаруашылық нысандарының аумағын қар суынан тазарттық. Құм толы 5 мыңнан астам қапшық дайындалды. Әзірге арқаны кеңге салуға ерте. Ауа райы да қолайсыз болады деп болжанып отыр», - деді Маңғыстау облыстық ТЖД басқарма бастығы Дастан Аманкешұлы.

Деркөл өзенінің деңгейі сәл көтерілген. Кейбір аумақтарында мұз ерімей, сең жиналып қалған. Қатты ағыс келген жағдайда кедергісіз өтуі үшін құтқарушылар осылай мұзды қолмен ойып жатыр.

Әкімдік теңгерімінде тасқынға тосқын шараларына қажетті 12 бірлік техника ғана бар. «Табиғи апат болған жағдайда шаруа қожалықтары мен кәсіпорындар жәрдем береді» дейді аудан әкімі.

Облыста Қаратөбе, Шыңғырлау, Жәнібек, Бөрлі аудандарында төтенше жағдай режимі сақтаулы тұр. Сондай-ақ Бәйтерек, Теректі аудандарында да алдын алу шаралары жүргізіліп жатыр.