Сондай-ақ олар өрттің басқа пәтерлерге жайылуына жол бермеді
Көлік полицейлері Маңғыстау облысында екі баланы өрттен құтқарды. Бұл туралы ҚР ІІМ Көліктегі полиция департаменті баспасөз қызметі мәлім етті, деп хабарлайды Azattyq Rýhy.
Департамент мәліметінше, оқиға 11 қаңтар күні Маңғыстау ауылында болды. Станциядан алыс емес жерде екі қабатты үйді жалын ораған. Өрт екінші қабаттағы пәтерден басталған. Қара түтін дәлізді басып кеткендіктен, адамдар, соның ішінде балалар өздігінен шыға алмаған. Өртті көрген көліктегі полиция бөлімінің алты қызметкері шұғыл жетіп, адамдарды шығарып, өртті сөндіре бастаған. Осы кезде олар пәтерлердің бірінен ересектердің қарауынсыз қалған үш баланы байқаған. Полиция лейтенанты Н.Қайыпбергенов баланың кішісін көтеріп алып, сыртқа шығарды.
Өрт сөндірушілер келгенге дейін тәртіп сақшылары А.Омарбаев, Н.Қуанов, Н.Қайыпбергенов, Р.Хамит, А.Көктаубаев, Б.Орынхан барлық тұрғынды эвакуациялап үлгерді. Сондай-ақ өрттің басқа пәтерлерге жайылуына жол бермеді. Көліктегі полиция департаменті аталған қызметкерлерді адамдарды құтқару кезіндегі ерлігі үшін ынталандыратын болады.