Қызылордада бүлік шығарған көпбалалы екі ана қамауға алынды

Қызылорда қаласында 5 қаңтар күні жаппай тәртіпсіздік кезінде екі азаматша бүлікшілермен бірге облыс әкімдігінің ғимаратына баса-көктеп кіріп, тәртіпсіздік жасаған. Бейне-жазбада көрсетілгендей азаматшалар Н.Ж мен Б.З тас лақтырып, әкімдіктің қоршауына мініп, балағат сөздер айтып, ғимаратқа заңсыз кірген. Бұл туралы Azattyq Rýhy Қызылорда қаласы Полиция басқармасына сілтеме жасап хабарлайды.

Аталмыш екі азаматшаға қатысты «сотқа дейінгі тергеп-тексеру бірыңғай тізіліміне» Қылмыстық кодексінің 272-бабының 2-бөлігімен (жаппай тәртіпсіздікке қатысу) қылмыстық іс тіркеліп, жан-жақты және объективті тергеп-тексеру жұмыстары жүргізілген.

«Бүгінгі күні екі азаматшаның қылмыстық әрекеттерін толық мойындағаны, асырауында кәмелетке толмаған балаларының болуы, соңғыларының денсаулық жағдайы мен өздерінің өтініштерін ескеріп, бас шарасы үй қамаққа ауыстырылды.

Әрбір дерек мұқият зерттеледі. Нәтижелері бойынша құқықтық баға берілетін болады», - делінген ведомство хабарламасында.