Жұмыс істеп тұрған мекемелер негізінен өткен ғасырдың 30-70-ші жылдарында барақ түріндегі салынған ғимараттар
Еліміздегі қылмыстық-атқару жүйесі мекемелерінде діни және террористік ұйымдардың 500-ден астам көшбасшысы мен қатысушысы өз жазаларын өтеп жатыр. Мұндай деректерді Сенат депутаты Андрей Лукин жоғары палатаның жалпы отырысында келтірді, деп хабарлайды Azattyq Rýhy.
Сенатор Үкімет басшысына жолдаған депутаттық сауалында түрмелердегі діни экстремизмге қарсы іс-қимыл және оның қылмысқа араласуына жол бермеу туралы ұсыныстарын айтты.
«Радикалдану Қазақстанның ұлттық қауіпсіздігіне, әсіресе қылмыстық-атқару жүйесіне төнетін қатерлердің бірі болып саналатынын ұмытпаған жөн. Биыл 1 қаңтардағы жағдай бойынша жалпы елімізде қылмыстық-атқару жүйесінде діни және террористік ұйымдардың 500-ден астам көшбасшысы мен қатысушылары бар екені есте болсын», - деді сенатор Лукин.
Депутат айтқан дерек бойынша, ҚАЖ-дағы бас бостандығынан айыруды өтеуге арналған 64 мекеменің тек 9-ында ғана камера бойынша ұсталынады, онда еліміздегі сотталғандардың жалпы санының 18,3%-ы ғана отыр. Жұмыс істеп тұрған мекемелер негізінен өткен ғасырдың 30-70-ші жылдарында барақ түріндегі салынған ғимараттар мен құрылыстар болып саналады. Андрей Лукин егер бір барақта түрме субмәдениеті мен қылмыстық ортаның бүкіл процесін жоққа шығаратын 100-ге жуық сотталған адам болса, онда мұндай жағдайда тәрбие жұмысы туралы айту мүмкін емес деп санайды.
«Мемлекет басшысының тапсырмасын сапалы орындау мақсатында, ең алдымен радикалды көзқарастағы сотталған адамдарды камерада ұстауды қамтамасыз ету үшін жұмыс істеп тұрған мекемелерге қайта жаңарту жүргізу, өлтірмейтін қарумен және арнайы құралдармен, оның ішінде радиобайланыс құралдарымен, техникалық күзет құралдарымен, ұялы байланысты бұғаттау жүйелерімен толық жарақтандыру арқылы түзеу мекемелеріндегі күзеттің тиімділігі мен қауіпсіздік деңгейін арттыру ұсынылып отыр», - деді сенатор Андрей Лукин.
Сонымен қатар, депутат тексеру құрал-жабдықтарымен жабдықтау арқылы сотталушылардың ұялы телефондарды заңсыз пайдалануына бақылауды күшейту мәселесін пысықтауды ұсынды.