Алматыда тәртіпсіздік кезінде 4 жасар қыз оқ тиіп қаза тапты

Алматыда 7 қаңтарда жаппай тәртіпсіздіктер кезінде 4 жасар қыз қаза тапты. Бұл туралы балалар омбудсмені Аружан Саин мәлім етті, деп хабарлайды Azattyq Rýhy.

"4 жасар қыз қаза тапты. Жасөспірім қыз жарақат алды. Олар Сейфуллин мен Сәтбаев көшелерімен қозғалып бара жатқан, көлік ішінде төрт бала мен бір ересек отырған. Оқиға 7 қаңтарда болды", - дейді Аружан Саин. 

Омбудсмен мұндай ақпаратты әкімдік пен мәйітханадан алғанын айтады.

Бұған дейін Аружан Саин 5 қаңтарда Алматыда бір бала оқ тиіп қаза болғанын мәлімдеген. Сонымен қатар, 7 қаңтарда Алматыдағы балалар ауруханасының біріне ауыр жарақаттармен 15 жастағы бала түсті. Омбудсмен бұл уақытта балалар ата-анасымен қала көшелерімен серуендеп жүргенін айтты. 

"Мен ата-аналар мен ересек адамдарға үндеу жасаймын, өтініш, балаларды байқаңыздар! Үйде отырыңыздар! Терезеге жақындамаңыздар! Балаларды жалғыз қалдырмаңыздар! Қажет болған жағдайда БҒМ байланыс нөмірлеріне хабарласыңыздар: +7 7172 74 25 28, +7 7761 70 73 83, +7 777 183 65 67, +7 701 378 66 29. Із-түссіз жоғалған балалар бойынша 1414 нөміріне хабарласыңыздар", - деді омбудсмен.