Жаңа ғимаратта 500 полиция қызметкері жұмыс істейтін болады
Нұр-Сұлтан қаласының әкімі Алтай Көлгінов Instagram парақшасында бес жылдан бері тоқтап қалған проблемалы нысан – полиция департаментінің бөлімшесіне арналған ғимарат құрылысы қайта басталғанын мәлім етті, деп хабарлайды Azattyq Rýhy.
«Тәртіп сақшыларына қолайлы еңбек жағдайын жасау және қала тұрғындарының қауіпсіздігін қамтамасыз ету үшін полиция департаментінің (Сарыарқа ауданы) бөлімшесіне арнап жаңа ғимараттың құрылысын жүргізіп жатырмыз. Құрылыстың өзі 5 жыл бұрын басталған, бірақ сот процестеріне байланысты проблемалы нысан ретінде танылды.
Маңызды нысанның құрылысын қайта бастау үшін бірқатар проблеманы шештік, оның ішінде құрылыс конструкцияларына техникалық тексеру жүргіздік: апатты тұстарын демонтаждадық, плиталарын күшейттік және т.б. Нысанды бірнеше айдан кейін пайдалануға беру жоспарланып отыр, жаңа ғимаратта 500 полиция қызметкері жұмыс істейтін болады», - деп жазды елорда әкімі.
Алтай Көлгінов өз сөзінде қала маңындағы төрт елді мекенде дене шынықтыру-сауықтыру кешені салынып жатқанын, онда қала тұрғындарының өтініші бойынша учаскелік полиция пунктері қарастырылғанын мәлім етті.
«Көктал елді мекенінде қазірдің өзінде дене шынықтыру-сауықтыру кешені жұмыс істеп тұр. Сондай-ақ, елорданың түрлі аудандарында қоғамдық тәртіп пен қауіпсіздікті қамтамасыз ету үшін, сол сияқты азаматтарымызға ыңғайлы болу үшін полицияның модульдік бекеттерін ашамыз, олардың санын бірінші кезеңде 10-ға дейін жеткіземіз. Сонымен қатар, 7 учаскелік полиция пункті жаңғыртылды. Бұл шараның бәрі бізге қаланы «Нұр-Сұлтан – жайлы қала» мастер-жоспары аясында дамытуға мүмкіндік береді, оның барысында әлеуметтік нысандар (мектептер, қолжетімді тұрғын үй, медициналық орталықтар, полицияның тірек пунктері және т.б.) қадамдық күйде қолжетімді болады», - деп жазды елорда әкімі.