Ыстанбұлға бет алған жолаушылар ұшағы Атырау әуежайына шұғыл қонуға мәжбүр болды
Ұшақ бортында 205 жолаушы болған
23 қыркүйек сағат 21:35-те Елордадан Ыстанбұлға ұшып шыққан Boeing-767 ұшағы техникалық себептерге байланысты Атырау халықаралық әуежайына қонды. Бұл туралы Атырау облыстық ТЖД баспасөз қызметінен хабарланды.
Boeing-767 ұшағының мәжбүрлі түрде қонуына жанар-жағармай жүйесіндегі техникалық ақау себеп болған. Борт Нұр-Сұлтан қалаынан Ыстанбұлға бет алған. Ұшақ Air Astana әуе компаниясына тиесілі.
Ұшақ бортында 205 жолаушы, оның ішінде 5 бала және экипаждың 5 мүшесі болған. Төрт жолаушы Атырау қаласында тұратын туыстарының үйіне барса, 2 жолаушы басқа ұшақпен Нұр-Сұлтан қаласына қайта оралған. Ал қалған 199 жолаушы «Sulo Hotel» қонақ үйіне орналастырылды.
Қазір ұшақты техникалық тұрғыда қалпына келтіру және жөндеу жұмыстары жүргізіліп жатыр. Бүгін сағат 14:00-де Boeing-767 ұшағы Ыстанбұл қаласына ұшып шығады деп жоспарланып отыр.
