Президент спорт секілді аса маңызды салада шұғыл әрі тиімді реформалар жүргізу қажет екенін айтты
Мемлекет басшысы Қасым-Жомарт Тоқаев Олимпиада ойындарына қатысқан қазақстандық спортшыларға алғыс білдірді, деп хабарайды Azattyq Rýhy.
Бұл туралы ол өзінің Тwitter-парақшасында жазды.
«Токиода өткен Олимпиада ойындарына Қазақстаннан 93 спортшы қатысты. Жеңіске жету жолында бар күш-жігері мен шеберлігін көрсеткен атлеттерге алғысымды білдіремін. Олимпиаданың қола жүлдегерлерін құттықтаймын. Бұл ұзақ уақыт бойы жүргізген табанды жаттығулардың жақсы нәтижесі», - деді Қасым-Жомарт Тоқаев.
Президенттің пікірінше, 8 қола медаль алып, жалпы командалық есепте 83-орынға табан тіреген Ұлттық құраманың бұл көрсеткіші Қазақстанның спорттағы әлеуетіне және мемлекет тарапынан спортты дамытуға бөлініп отырған мол қаражатқа сәйкес келмейді.
«Ұлттық құрамның Олимпиададағы көрсеткіші спорт секілді аса маңызды салада шұғыл әрі тиімді реформалар жүргізу қажет екенін көрсетті. Бұқаралық және балалар спортын дамытуға көңіл бөліп, сол арқылы әлемдік аренада үлкен табыстарға қол жеткізуге ұмтылу қажет.
Токио Олимпиадасынан сабақ алып, Парижде өтетін келесі ойындарда халық үмітін ақтайтындай нәтижеге қол жеткізу керек», - деп атап өтті Мемлекет басшысы.