Өткен тәулікте 500-ге жуық қазақстандық ПТР-анықтамасыз ұшып келді

25 ақпан күні Қазақстан аумағына Мальдив Республикасы, БАӘ, Мысыр, Түркия, Ресей, Өзбекстан және Қырғызстаннан 15 халықаралық әуе рейсі ұшып келді, деп хабарлайды Azattyq Rýhy тілшісі ҚР ДСМ Санитариялық - эпидемиологиялық бақылау комитетіне сілтеме жасап.

«Бір тәулікте елімізге шетелден барлығы 2178 жолаушы ұшып келді. Олардың 1682-сінде коронавирусқа ПТР-тестілеудің теріс нәтижесі бар анықтама болған. Қалған 496-сында анықтама болған жоқ, барлығы да Қазақстан азаматтары. Анықтамасы болмаған Қазақстан азаматтары келген жерлері бойынша COVID-19-ға ПТР-талдау әдісімен тестіленді және карантиндік стационарларда өз нәтижелерін күтуде», - деп жазылған хабарламада.

Сондай-ақ 24 ақпанда шетелден анықтамасыз келген Қазақстанның 284 азаматының ПТР-талдауларының нәтижесі дайын болған – ешбір жолаушыда коронавирус табылған жоқ.