COVID-19 вирусын жұқтырғандар саны 87,58 млн адамнан асып кетті
Әлемде өткен тәулікте коронавирус инфекциясын жұқтырғандар саны 799 мыңға көбейді. Жалпы, пандемия басталғалы бері COVID-19 вирусын жұқтырғандар саны 87,58 млн адамнан асып кетті, деп хабарлайды Azattyq Rýhy.
Дүниежүзілік денсаулық сақтау ұйымының (ДДСҰ) мәліметіне сәйкес, қауіпті вирустан көз жұмғандар саны 15,4 мыңға артып, барлығы 1,9 млн-нан асты.
«Өткен тәулікте вирус жұқтырғандар туралы ең көп хабарлама Солтүстік және Оңтүстік Америкадан (441 723), одан кейін Еуропадан (273 942), сондай-ақ Африка (30 961) елдерінен келген», - деп мәлімдеді ДДСҰ.
Ұйым статистикалық деректерде тек әр мемлекет ұсынған ресми мәліметтер ғана ескерілетінін атап өтті.
COVID-19 вирусын ең көп жұқтырған елдер ішінде АҚШ (21 447 670) бірінші орынға шығып кетті. Екінші орында Үндістан (10 413 417), ал үшінші орында Бразилия (7 961 673) тұр. Одан кейінгі орындарда Ресей (3 379 103), Ұлыбритания (2 957 476) және Франция (2 701 658) бар.