Ситерлер отбасы көз тимес үшін қуанышты жаңалықты жария етпей келген
Нұр-Сұлтан қаласында екі жыл бұрын өрт салдарынан бес бірдей баласынан айырылып қалған Ситерлер отбасында ұл бала дүниеге келді. Бұл туралы блогер Тәңірберген Бердоңғар Instagram парақшасында хабарлады.
«Өрттен бес бірдей баласынан айырылып, ауыр қасіретті бастан өткерген Ситерлер отбасын құттықтаймын. Жанымгүл көз тимес үшін аяғы ауыр екенін құпияда ұстап келген болатын. Бүгін олардың үйінде қуанышты жаңалық болды! Өмірге ұл бала келді! Құттықтаймыз! Біз халық болып Жаратқаннан сәбиге тек жақсылық тілейміз. Ол сіздердің қыздарыңызға деген зор махаббаттарыңыздың, әпкелерінің лайықты мұрагері болып өссін! Бауы берік болсын!», - деп жазды сүйінші жаңалықты жеткізген Тәңірберген Бердоңғар.
Еске салсақ, 2019 жылы 4 ақпан күні түнде дүйім жұртты дүрліктірген қайғылы оқиға болған еді. Астананың Сарыарқа ауданындағы Көктал-1 тұрғын алабында өрт шығып, соның салдарынан 2006, 2008, 2014, 2016, 2018 жылы дүниеге келген бес бала мерт болған. Балалардың ең кішісі бір жасқа толмаған сәби болатын.