Істі Талғар аудандық соты биыл 10 желтоқсанда қарайды
Биыл 21 ақпанда «Bek Air» компаниясының басшылығы Алматы әуежайының маңында заңсыз салынды делінген үйдің иесі Решет Қалибекті сотқа берген болатын. Компания иесі Нұрлан Жұмасұлтанов Алматы облысы Талғар аудандық сотында әуе компаниясына тиесілі ұшақ соғылған ғимарат құрылысын заңсыз деп тану жөнінде шағымданған. Көп ұзамай жердің иесі Решет Қалибек те әуе компаниясына қарсы арыз беріп, екі ай қаралған талап арызды сот 7 сәуірде тоқтатты.
Заңгер Жәнібек Башанов ұшақ құлаған аумақта құжат жүзінде жер болғанымен, үйдің жоқ екенін, сондықтан әуе компаниясының берген талап арызы негізсіз деген еді. Осы өтініш бойынша сот қазысы қаулы шығарып, азаматтық тәртіптегі соттың екеуі де доғарылды.
Оқи отырыңыз: Талғар соты Bek Аir-дің үй иесіне қарсы талап арызын қараусыз қалдырды
Алайда, Azattyq Rýhy тілшісіне сұқбат берген Решет Қалибек Талғар аудандық соты биыл 10 желтоқсанға шақырту жібергенін айтты. Көктемде істің тоқтатылғаны белгілі, бірақ «Bek Аir» тынышталар емес дейді ол.
«Кішкене қобалжу бар, өйткені бұл алпауыт компания ғой. Онымен тіресу қолымыздан келе ме, келмей ме? Бәрі бір Құдайдың қолында. Бірақ әділдік болады деп ойлаймын. Компанияның айтқаны қып-қызыл жала, себебі ұшақтың үйге соқтығыспай тұрып істен шыққаны анықталды. Зауыттан шыққанына 26 жыл болған, әбден тозығы жеткен ұшақтың құлағанын менен көріп тұр. Қорғаушыларым Бақытжан Базарбек пен Жәнібек Башановқа сенім артып отырмын. Көмектеседі деп ойлаймын», - дейді Р. Қалибек.
Айта кету керек, Талғар ауданында, соның ішінде ұшақ құлаған Гүлдала елдімекенінде жер телімдерін заңсыз сатты деген күдікке ілінген екі қылмыстық топқа қатысты іс тергеліп жатыр. Жақында біз оның екеуі де әлі сотқа жетпегенін жазған болатынбыз. Бірнеше адам тергеліп жатқан қылмыстық істерді Алматы облысының прокуратурасы қайта қарап жатыр. Биыл 7 сәуірде шыққан Талғар аудандық сотының қаулысында судья Қарлығаш Есәлинова жоғарыда айтылған қылмыстық істер бойынша үкім шықпайынша, «Bek Аir» берген азаматтық талап арыз қаралмайды деген болатын.
«Талғар ауданында заңсыз жер сатқандардың үстінен 2 қылмыстық іс қозғалған болатын, солардың ісі қалай бітеді, мен солай дүние-мүлкімді қайта қалпына келтіруге әрекеттенемін. Себебі мен оны таза еңбегіммен алған болатынмын. 14 мың АҚШ долларына жер алдым, 12 млн теңгені үй салуға жұмсадым. Жалпы, менің тілегім, қайтыс болған 12 адамның кінәсін маған артып қоймай, кінәлілер шынайы жазасын алса деймін», - дейді баспана иесі.
Решет Қалибек, қираған үйдің иесі
Заңгер Жәнібек Бошанов та 10 желтоқсанда өтетін сотқа әуе компаниясы қандай негізде талап арыз бергенін түсіне алмағанын айтады.
«Иә, Bek Air қайтадан талап арыз түсірді. Олардың мақсаты үйді заңсыз салынған деп тану. Осылайша Решет Қалибекке жала жаппақшы. Енді көреміз, 10 желтоқсанға істі қарау жоспарланған. Онлайн өтеді. Сот бұл талап арызды қабылдамайтын шығар деп үміттенеміз. Егер істі жалғастырса, соттасуға дайынбыз. Мен Решеттің адвокаты ретінде оны қорғаймын», - дейді Жәнібек Башанов.
Айта кетейік, былтыр 27 желтоқсанда Алматыдан Нұр-Сұлтанға бағыт алған Bek Air әуе компаниясының рейсі апатқа ұшырады. Қайғылы жағдайдан 12 адам қаза болып, 49 адам ауруханаға жеткізілді. Ал әуе компаниясының қызметі тоқтатылып, лицензиясы кері қайтарылды.
Ришат Асқарбекұлы, Алматы