Атырауда шілде айында іске қосылған COVID-такси қызметі жұмысын тоқтатты

Шілде айында, коронавирус өршіген тұста Атырауда және Құлсарыда пневмония мен коронавирустан үйде ем алып жатқан науқастарға медициналық көмек көрсету үшін COVID-такси қызметі ашылған болатын. Енді үш айдан астам уақыт жұмыс істеген COVID-такси жұмысын тоқтатты. Бұл туралы azh.kz хабарлайды. 

«Шақыртудың азаюына байланысты COVID-такси қызметін тоқтатты. Барлық шақыртуларға өзіміздің жедел-жәрдем көліктері үлгереді. Бірақ екінші толқын басталса, қайтадан COVID-таксиді іске қосуды жоспарлап отырмыз. Өйткені, ол біздің жұмысымызды едәуір жеңілдетеді», - дейді Жедел жәрдем станциясы бас дәрігерінің орынбасары Наргиз Баймолдаева.

Естеріңізге салсақ, COVID-такси бригадасы жүргізуші мен фельдшерден тұрады. Жүргізуші де алғашқы медициналық көмек көрсете алады. Бұдан бөлек, пневмония мен коронавирустан емделіп жатқан науқастар дәрі-дәрмек алу үшін COVID-такси қызметін пайдалана алады.