Еліміздегі қатерлі ісікке шалдыққан науқастарға берілетін тегін дәрілер Ресейде сатылған

Қатерлі ісікке шалдыққандарға тегін таратылған дәрі-дәрмек Ресей дәріханаларында сатылған. Еліміздегі науқастарға ақысыз үлестірілгенімен, негізі бұл препараттардың әр қорабының өзі миллион теңгеден асады, деп хабарлады КТК.

Бюджеттің миллиардтарына алынған дәрі-дәрмектің көрші елге қалай жеткені әзірге белгісіз.

«Бізге «Ресейде қазақстандық мөрмен дәрі-дәрмектер сатылып жатыр» деп науқастар хабарлап айтты. «СК-Фармация» сатып алатын бұл препараттарға мөр тек тегін таратылатын жағдайда ғана басылады. Біз тексеріс жүргізуді бастадық. Егер дәрі-дәрмектердің заңсыз тасымалданғанын анықтасақ, істі сол мезетте Бас прокуратураға жолдаймыз», - деді ҚР Денсаулық сақтау министрлігінің комитет төрайымы Людмила Бюрабекова.

Дәрі-дәрмектер терінің қатерлі ісігіне шалдыққан науқастарға арналған. Денсаулық сақтау министрлігі адам өміріне маңызды дәріні ресейліктерге кімнің заңсыз тасымалдағанын анықтап жатыр. Ведомство кінәлілерді табу оңайға соқпайтынын жасырмады. Өйткені медикаменттер тек 11 стационарға жеткізілген.   

Мұндай жағдай елімізде алғаш емес. Жылдың басында қазақстандықтарға арналған инсулин Өзбекстан дәріханаларында сатылған. Ол кезде Денсаулық сақтау министрі Елжан Біртанов заңсыз жеткізгендердің табылып, 28 қылмыстық іс қозғалғанын айтқан.