Маңғыстау облысында есірткі зертханасы әшкереленді

Автор: Дәулет Ботагөз

Күдіктінің тұрғылықты жерін тінту кезінде арнайы жабдықталған орыннан 44 түп марихуана өсімдігі табылған

Фото: © istockphoto.com

Маңғыстау облысында құқық қорғау органдары есірткі заттарын заңсыз өсірумен айналысқан жасырын зертхананың қызметін тоқтатты. Жедел-іздестіру іс-шаралары өңірлік прокуратураның бастамасымен жүзеге асырылды, деп хабарлайды Azattyq Rýhy облыстық прокуратураның баспасөз қызметіне сілтеме жасап.

Қадағалау органының мәліметінше, арнайы операция биыл қазан айында жүргізілген. Нәтижесінде есірткі өсімдіктерін заңсыз өсіріп, сақтаумен айналысқан күдікті ұсталды.

Күдіктінің тұрғылықты жерін тінту кезінде арнайы жабдықталған орыннан 44 түп марихуана өсімдігі табылған. Сонымен қатар өсімдіктерді өсіруге арналған шамдар, таймерлер және өзге де арнайы құрал-жабдықтар тәркіленді.

Алдын ала тергеу деректеріне сәйкес, күдікті тыйым салынған өнімді кейіннен сатуды көздеген.

Аталған факті бойынша Қазақстан Республикасы Қылмыстық кодексінің 300-бабының 1-бөлігімен, яғни құрамында есірткі заттары бар, өсіруге тыйым салынған өсімдіктерді заңсыз егіп-өсіру дерегі бойынша сотқа дейінгі тергеп-тексеру басталды.