Ведомство арбаны бүктеп алып жүру талабы қауіпсіздік үшін енгізілгенін, ал оны жайылған күйінде алып жүруге де тыйым салынбағанын түсіндірді
Көлік министрлігі автобустарға балалар арбасымен кіруге тыйым салынғаны туралы тараған ақпаратты жоққа шығарды. Ведомствоның мәлімдеуінше, қолданыстағы ережелер ата-аналардың балалар арбасымен қоғамдық көлікке мінуіне шектеу қоймайды, деп хабарлайды Azattyq Rýhy ведомствоға сілтеме жасап.
«Қолданыстағы қағидалар ата-аналардың балалар арбасымен жүруіне тыйым салмайды. Автомобиль көлігімен жолаушылар мен багаж тасымалдаудың жаңартылған қағидаларына сәйкес, автобус лық толы болған жағдайда ата-анаға отыруға бос орын болған кезде арбаны бүктеп алып жүру қарастырылған. Бұл ретте арба жолаушылардың еркін қозғалысына кедергі келтірмеуі керек», – деп жазылған ведомство хабарламасында.
Министрлікте бұл талап жолаушылардың, соның ішінде балалар мен оларды алып жүретін ата-аналардың қауіпсіздігін қамтамасыз етуге және автобус салонындағы өту жолын бос ұстауға бағытталғанын түсіндірді.
«Егер ата-анаға арбаны бүктеу ыңғайсыз болса, сапарын оны жайылған күйінде жалғастыра алады. Бұл үшін айыппұл салу, жолаушыны автобустан түсіру немесе басқа да жаза қолдану қарастырылмаған», – деп атап өтті Көлік министрлігі.
Еске салайық, әлеуметтік желілерде күзде жолаушылар тасымалы қағидаларына енгізілген түзетулерден кейін балалар арбасымен жүрген ата-аналарды лық толы автобустарға кіргізбей жатқаны туралы ақпарат тараған еді. Бұл мәлімет қазақстандықтардың наразылығын тудырды. Осыған байланысты Көлік министрлігі ресми түсініктеме беріп, ешқандай тыйым енгізілмегенін мәлімдеді.