20 мамырдан бастап UTC уақытына кібісе секунд қосылмайды. Бұл өзгеріс күнделікті уақытты көрсетуге әсер етпейді, бірақ цифрлық жүйелер үшін маңызды
2027 жылғы 20 мамырдан бастап халықаралық уақыт өлшеу жүйесіне елеулі өзгерістер енгізіледі, деп хабарлайды Azattyq Rýhy.
Adevarul басылымының жазуынша, бүкіл әлемде сағаттарды синхрондау үшін қолданылатын үйлестірілген әмбебап уақыт (UTC) енді кібісе секундтарды қосу арқылы түзетілмейді. Мұндай шешім 15 қазанда Версальда өткен Өлшемдер мен салмақтар жөніндегі бас конференцияның отырысында қабылданған.
Өлшемдер мен салмақтар жөніндегі бас конференция – мүше мемлекеттердің өкілдері өлшем стандарттарын талқылап, шешім қабылдайтын халықаралық орган. Оның отырыстары әдетте төрт жылда бір рет өтеді. Ұйымға 69 мүше мемлекет және 34 қауымдастырылған мемлекет пен экономика кіреді. Олардың қатарында Германия, Франция, Италия, Испания, Ұлыбритания, АҚШ, Канада, Бразилия, Қытай, Жапония, Үндістан, Аустралия және Жаңа Зеландия бар.
Бұл органның жұмысы ғылыми зерттеулерге, өнеркәсіпке, саудаға және заманауи технологиялардың жұмыс істеуіне қажетті ортақ стандарттарды қалыптастыруға ықпал етеді.
Қазір уақытты өлшеудің екі негізгі жүйесі бар. UTC жоғары дәлдігімен танымал атом сағаттарының көрсеткіштері негізінде есептеледі. Ал астрономиялық уақыт Жердің айналуына байланысты анықталады. Ғаламшар бірқалыпты жылдамдықпен айналмайтындықтан, осы екі жүйенің арасында айырмашылық пайда болуы мүмкін.
Олардың көрсеткіштерін бір-біріне жақын ұстау үшін 1972 жылдан бері 27 кібісе секунд қосылды. Соңғы түзету 2016 жылдың соңында жасалған. Мұндай жағдайда минут әдеттегідей 60 емес, 61 секундтан тұруы мүмкін.
Адамдар бұл айырмашылықты күнделікті өмірде байқамаса да, компьютерлер мен цифрлық инфрақұрылымдарға әсер етуі ықтимал. Қосымша секунд енгізу техникалық бейімдеуді қажет етеді. Бұған дейін кейбір компьютерлік жүйелер мен онлайн сервистердің жұмысында ақаулар туындағаны хабарланған.
Телекоммуникация, спутниктік навигация, энергетикалық желілер және көптеген цифрлық платформа сағаттардың дәл синхрондалуына тәуелді. Сондықтан мерзімді түзетулерден бас тарту қателердің туындау қаупін азайтып, жүйені басқаруды жеңілдетеді.
Осыған байланысты халықаралық қауымдастық UTC уақытын мерзімді түзетудің қолданыстағы тетігінен бас тарту туралы шешім қабылдады. Нәтижесінде ресми уақыт пен астрономиялық уақыт арасындағы айырмашылық біртіндеп ұлғайып, шамамен 3 600 секундқа, яғни бір сағатқа жетуі мүмкін.
Күнделікті өмірде кібісе секундты қосудың тоқтатылуы адамдардың сағаттар мен телефондардан уақытты оқуына әсер етпейді. Бұл өзгеріс жазғы немесе қысқы уақытқа көшуге байланысты емес және маусымдық уақыт түзету ережелеріне ықпал етпейді.
Өзгерістер астрономия, геодезия және кейбір спутниктік қосымшалар сияқты уақытты аса жоғары дәлдікпен синхрондау қажет салаларда көбірек сезіледі.