Ертіс өзенінде катер істен шығып, алты адам су ортасында қалған
Оқиға орнына ТЖМ құтқарушылары жедел жетіп, іздестіру-құтқару жұмыстарын жүргізді
Өскемен қаласында Ертіс өзенінің акваториясында катердегі серуен төтенше жағдайға ұласты. Бортында алты демалушысы бар, оның ішінде екі баласы бар катер қозғалтқышының кенеттен бұзылуына байланысты су ортасында тоқтап қалған. Жолаушылар өздігімен жағаға жете алмаған, деп хабарлайды Azattyq Rýhy.
Оқиға орнына ТЖМ құтқарушылары жедел жетіп, іздестіру-құтқару жұмыстарын жүргізді. Мамандар катердегі барлық азаматты, соның ішінде балаларды да аман-есен жағаға эвакуациялады.
Құтқару операциясының нәтижесінде ешкім зардап шеккен жоқ және демалушыларға медициналық көмек қажет болмады.
Осыған байланысты Төтенше жағдайлар министрлігі су айдындарында жүзу құралдарын пайдалану кезінде олардың техникалық жай-күйін мұқият тексеруді және қауіпсіздік шараларын қатаң сақтауды ескертті.
