Ең төменгі жалақы 85 мың теңге деңгейінде өзгеріссіз қалады
Қазақстанда 2027 жылғы 1 қаңтардан бастап негізгі әлеуметтік және есептік көрсеткіштерді арттыру жоспарланып отыр. Жаңа мөлшерлер «2027-2029 жылдарға арналған республикалық бюджет туралы» заң жобасында қарастырылған, деп хабарлайды Azattyq Rýhy.
Құжатқа сәйкес, келесі жылдың басынан бастап:
ең төменгі мемлекеттік базалық зейнетақы төлемін – 38 622 теңге;
ең төменгі зейнетақыны – 74 919 теңге;
айлық есептік көрсеткішті (АЕК) – 4 693 теңге;
ең төменгі күнкөріс деңгейін – 55 173 теңге мөлшерінде белгілеу ұсынылады.
Бұл ретте ең төменгі жалақы бұрынғы деңгейде – 85 мың теңге болып қалады.
2027 жылғы 1 қаңтардан бастап жасына байланысты және еңбек сіңірген жылдары үшін төленетін зейнетақы мөлшерін 8,5%-ға арттыру ескеріліп, бюджетте тиісті қаражат қарастырылған.
Салыстыру үшін, 2026 жылы:
ең төменгі мемлекеттік базалық зейнетақы төлемі – 35 596 теңге;
ең төменгі зейнетақы – 69 049 теңге;
АЕК – 4 325 теңге;
ең төменгі күнкөріс деңгейі – 50 851 теңге.
Осылайша, 2027 жылы бұл көрсеткіштерді шамамен 8,5%-ға арттыру жоспарланып отыр.
2027 жылға арналған республикалық бюджет шығыстары 30,2 трлн теңге көлемінде жоспарланған. Бұдан бөлек, Қазақстан Президенті айқындаған мақсаттарға Ұлттық қордан 2 трлн теңге көлемінде нысаналы трансферт қарастыру ұсынылады.