Ақтауда ер адам 12-қабаттағы үйіне балкон арқылы кіремін деп құлап кетті
Ол оқиға орнында көз жұмды
Ақтауда көпқабатты үйдің 12-қабатындағы балконнан құлаған ер адамның өліміне байланысты сотқа дейінгі тергеу басталды, деп хабарлайды Azattyq Rýhy агенттігі Lada.kz-ке сілтеме жасап.
«Оқиға бойынша полиция тексеру жүргізіп жатыр. Сотқа дейінгі тергеу басталды», – деп хабарлады Маңғыстау облысы полиция департаменті.
Қайғылы оқиға 25 шілде күні таңертең Ақтау қаласының 19А шағынауданындағы тұрғын үйлердің бірінде болған. Алдын ала мәлімет бойынша, ер адам пәтеріне балкон арқылы кірмек болған кезде 12-қабаттан құлап кеткен. Ол алған жарақаттарынан оқиға орнында көз жұмды.
Маңғыстау облысы полиция департаментінің мәліметінше, аталған дерек бойынша тексеру жүргізіліп жатыр. Оқиғаның барлық мән-жайын анықтау мақсатында сотқа дейінгі тергеу басталды.
Жергілікті БАҚ-тың бейресми дереккөздерге сілтеме жасап хабарлауынша, көз жұмған азамат бұған дейін Маңғыстау облысы Түпқараған ауданының бас прокуроры қызметін атқарған. Ол 2025 жылы зейнетке шыққан. Сондай-ақ оның Атырау облысында жерленгені хабарланды.
