Америкалық сарапшы Қазақстандағы жаңа сайлау үлгісіне баға берді
Жаңа сайлау үлгісіне көшу және алдағы дауыс беру науқаны Қазақстанның өз ішінде ғана емес, халықаралық қауымдастықтың да қызығушылығын тудырып отыр. Америкалық сарапшы Джонатан Миллердің пікірінше, бұл қадам еліміздің халықаралық аренадағы беделін нығайтып, сыртқы саяси бағытына қосымша серпін бере алады, деп хабарлайды Azattyq Rýhy.
Биыл 23 тамызға белгіленген Құрылтай депутаттарының сайлауы халықаралық сарапшылар қауымдастығының назарын аударып отыр. Алдағы саяси науқанға деген қызығушылық дауыс беру үдерісімен ғана емес, оның еліміздің жаңартылған конституциялық жүйесі аясында өтуімен де байланысты.
Pendulum Geopolitical Advisory геосаяси консалтингтік компаниясының тең құрылтайшысы Джонатан Миллердің айтуынша, алдағы сайлау Қазақстан мен оның азаматтары үшін тарихи маңызы зор кезең болмақ.
«Қазақстандағы алдағы сайлауға қатысты айтар болсам, бұл шынымен де ел мен оның азаматтары үшін аса маңызды әрі тарихи кезең деп есептеймін. Өздеріңіз білетіндей, Қазақстан жақында жаңа Конституция қабылдады. Ең алдымен, Қазақстан мен оның азаматтарына осы сайлау кезеңінің сәтті өтуіне тілектес екенімді жеткізгім келеді», – деді Джонатан Миллер.
Сарапшының пікірінше, сайлаудың жаңа конституциялық жағдай аясында өтуінің өзі Қазақстанның сайлау жүйесін жетілдіруге және оның ашықтығын арттыруға бағытталған дәйекті ұмтылысын көрсетеді. Оның айтуынша, мұндай қадам елдің халықаралық серіктестеріне де маңызды белгі болмақ.
«Меніңше, бұл Қазақстанның сайлау үдерісін одан әрі дамыту мен жетілдірудің, соның ішінде оның ашықтығын арттырудың жаңа жолдарын іздеуге ұмтылып отырғанын көрсетеді. Бұған еліміздің көптеген халықаралық серіктестері назар аударады және бұл Қазақстан жүргізіп отырған көпвекторлы сыртқы саясатқа толық сәйкес келеді», – деді Джонатан Миллер.
Сарапшы сондай-ақ мұндай қадамдардың Қазақстанның көп жылдан бері халықаралық аренадағы негізгі басымдықтарының бірі болып келе жатқан көпвекторлы сыртқы саясатының логикасына толық сай келетінін атап өтті. Оның пікірінше, бұл ұстаным елге халықаралық серіктестердің кең аясымен теңгерімді қарым-қатынас орнатуға мүмкіндік береді.
Джонатан Миллер дауыс беру қорытындысын әлі күту қажет екенін айтқанымен, жаңартылған жүйе аясында сайлаудың өтуінің өзін Қазақстанмен екіжақты ынтымақтастықты одан әрі дамыту тұрғысынан маңызды әрі үміт күттіретін қадам деп бағалады.
«Әрине, сайлау нәтижесін әлі күтуіміз керек және Қазақстан халқы қандай таңдау жасайтынын уақыт көрсетеді. Дегенмен, мен мұны маңызды қадам әрі Қазақстанмен ынтымақтастықты одан әрі нығайтуымыз қажет екенін дәлелдейтін тағы бір айқын белгі деп санайтынымды атап өткім келеді», – деп түйіндеді Джонатан Миллер.
Америкалық сарапшының бұл бағасы алдағы сайлаудың Қазақстаннан тыс жерде де елде жүзеге асып жатқан реформалардың жүйелілігі мен саяси кемелдігін көрсететін маңызды оқиға ретінде қабылданып отырғанын аңғартады. Осы тұрғыдан алғанда, Құрылтай сайлауы ел ішіндегі саяси науқан ғана емес, Қазақстанның халықаралық беделі мен ұстанымын одан әрі нығайтуға ықпал ететін маңызды факторлардың біріне айналуы мүмкін.