Алматыдағы LRT құрылысы: Төле би көшесінде ескі бағандар бұзыла бастайды
25 шілдеден бастап бұрынғы трамвай желісінің 165 тірегі алынып, олардың орнына жаңа жарықтандыру бағандары орнатылады
Алматыда жеңіл рельсті көлік (LRT) желісінің алғашқы желісін салу жұмыстары жалғасып жатыр. Осыған байланысты Төле би көшесінің Момышұлы көшесінен Жароков көшесіне дейінгі бөлігінде бұрынғы трамвай желісінің байланыс желісіне тиесілі 165 ескі тірек бұзыла бастайды, деп хабарлайды Azattyq Rýhy Алматы қаласы әкімдігінің баспасөз қызметіне сілтеме жасап.
Әкімдік мәліметінше, алынатын тіректердің орнына сәндік сыртқы жарықтандыру бағандары орнатылады.
Қазіргі тіректерде электр беру желілері, байланыс, интернет-провайдерлердің кабельдері және басқа да инженерлік коммуникациялар орналасқан. Алайда кейбір желі иелері оларды әлі күнге дейін көшірмеген. Сонымен қатар бірқатар желілердің иелері әзірге анықталмаған.
Осыған байланысты Жол қозғалысын ұйымдастыру орталығы инженерлік коммуникация иелерін өздеріне тиесілі желілерді 24 шілдеге дейін өз күшімен бөлшектеуге немесе қайта орналастыруға шақырды.
Ал 25 шілдеден бастап аталған учаскеде LRT-ның алғашқы желісін салу аясындағы құрылыс-монтаж жұмыстары басталады.
Жол қозғалысын ұйымдастыру орталығы қайта жаңғырту аяқталғаннан кейін жаңа тіректерде қолданыстағы әуе арқылы тартылған инженерлік желілерді орналастыру жобаға енгізілмегенін еске салды. Сондықтан барлық коммуникацияны алдын ала көшіру қажет.
Көп оқылған
