«Бананнан» құлаған: Қапшағайда жас жігіт қолын шығарып алып, суға батып кете жаздады (ВИДЕО)

Алматы облысының Қонаев қаласында Төтенше жағдайлар министрлігінің қызметкерлері Қапшағай су қоймасында суға құлаған 23 жастағы жігітті құтқарды, деп хабарлайды Azattyq Rýhy. 

ТЖМ мәліметінше, оқиға Қапшағай су қоймасының солтүстік жағалауында болған. Жедел-құтқару жасағының қызметкерлері патрульдеу кезінде «банан» үлгісіндегі үрлемелі су аттракционынан құлап кеткен жігітке көмекке келген.

Белгілі болғандай, демалушы су аттракционында сырғанап жүргенде суға құлап, қолын шығарып алған. Жарақатына байланысты ол өздігінен жағаға жете алмаған.

Құтқарушылар ер адамды судан шығарып, жағаға жеткізді. Кейін ол жедел медициналық жәрдем бригадасына тапсырылды.