Кей өңірлерде аптап ыстық пен төтенше өрт қаупі сақталады
«Қазгидромет» 13 шілдеге Қазақстанның барлық 17 облысы мен Астана, Алматы және Шымкент қалалары бойынша дауылды ескерту жариялады. Елдің бір бөлігінде найзағай ойнап, бұршақ пен шаңды дауыл күтілсе, кей өңірлерде аптап ыстық пен төтенше өрт қаупі сақталады, деп хабарлайды Azattyq Rýhy.
Қостанай облысының батысы, солтүстігі мен шығысында жаңбыр жауып, найзағай ойнайды. Бұршақ жауып, дауыл соғуы мүмкін. Жел екпіні секундына 15-20 метрге жетеді.
Солтүстік Қазақстан облысында күндіз жаңбыр, найзағай, бұршақ пен дауыл болжанды. Түнде және таңертең кей жерлерде тұман түседі. Күндіз ауа температурасы +35…+36 градусқа дейін көтеріледі.
Батыс Қазақстан облысының батысы, солтүстігі мен оңтүстігінде де жаңбыр, найзағай, бұршақ және дауыл күтіледі. Өңірде +35…+38 градус ыстық сақталады.
Ақмола облысының батысы, солтүстігі мен оңтүстігінде жаңбыр жауып, найзағай ойнайды. Жел секундына 15-20 метрге дейін күшеюі мүмкін.
Астанада күндіз ауа температурасы +35…+39 градусқа дейін көтеріледі. Елордада жоғары өрт қаупі сақталады.
Алматыда күндіз өткінші жаңбыр жауып, найзағай ойнайды. Іле Алатауы тауларында да таңертең және күндіз жаңбыр мен найзағай күтіледі.
Шымкентте жел екпіні секундына 15-20 метрге дейін күшейеді. Қалада жоғары өрт қаупі сақталады.
Қызылорда облысының солтүстігінде шаңды дауыл болжанды. Желдің жылдамдығы секундына 15-20 метрге жетеді. Өңірдің бірқатар бөлігінде төтенше өрт қаупі сақталады.
Жамбыл облысының солтүстік-шығысында да шаңды дауыл болуы мүмкін. Таулы аудандарда өткінші жаңбыр жауып, найзағай ойнайды.
Түркістан облысының батысы, солтүстігі, таулы және тау бөктеріндегі аудандарында жел күшейеді. Облыстың басым бөлігінде жоғары және төтенше өрт қаупі бар.
Шығыс Қазақстан, Абай, Павлодар, Қарағанды, Жетісу, Алматы, Түркістан, Жамбыл және Қызылорда облыстарының жекелеген аудандарында төтенше өрт қаупі жарияланды.
Маңғыстау, Атырау, Ақтөбе және басқа да бірқатар өңірде жел күшейіп, кей жерлерде жаңбыр мен найзағай күтіледі.
Синоптиктер тұрғындарға ауа райының күрт өзгеруін ескеріп, қатты жел мен найзағай кезінде сақ болуға және өрт қауіпсіздігі талаптарын қатаң сақтауға кеңес береді.