Астанада қолына кастет таққан бір топ бозбала жасы кіші балаларды аяусыз ұрып кеткен (ВИДЕО)

Астана қаласында қолына кастет таққан бір топ бозбала аулада жүрген жасы кіші балаларды аяусыз ұрып кеткен, деп хабарлайды Azattyq Rýhy.

Зардап шеккен балалардың ата-аналарының айтуынша, бір топ жасөспірім бес баланы кезек-кезек соққыға жыққан. Балалардың бірінің соққыға жығылған сәті түсірілген бейнежазба бар. Сондай-ақ басқа да кәмелетке толмағандардың зардап шеккенін растайтын деректер бар. Алдын ала мәлімет бойынша, шабуыл кезінде кастет қолданылған болуы мүмкін.

Барлық дене жарақаттары тіркелген. Ата-аналар құқық қорғау органдарына жүгініп, тиісті арыз жазған. Сондай-ақ оқиғаға қатысушылардың кейбірі бұған дейін профилактикалық есепте тұрғаны хабарланды.

Оқыс жағдайға қатысты қалалық Полиция департаменті ресми түсініктеме берді.

«Оқиғаға қатысқан барлық тұлға бір-бірін бұрыннан танитыны анықталды. Олар Сарыарқа ауданы полиция басқармасына жеткізілді. Дене жарақатын келтіру фактісі бойынша сотқа дейінгі тергеу тіркелді», – делінген ПД хабарламасында.