Шешім жол жөндеу жұмыстарына байланысты қабылданды
Астанада 7 маусым күні Қорғалжын тасжолының Тұран даңғылынан Қабанбай батыр даңғылына дейінгі бөлігінде қозғалысқа уақытша шектеу енгізіледі. Бұл шешім жол жөндеу жұмыстарына байланысты қабылданды, деп хабарлайды Azattyq Rýhy.
Астана қаласының Көлік және жол-көлік инфрақұрылымын дамыту басқармасының мәліметінше, Қорғалжын тасжолының Тұран даңғылы мен Қабанбай батыр даңғылы аралығындағы бөлігінде жол жабынын ағымдағы жөндеу жұмыстары басталады.
Жөндеу мердігер ұйымның кепілдік міндеттемелері аясында жүргізіледі.
Жөндеу жұмыстары кезінде аталған учаскеде көлік қозғалысы ішінара шектеледі.
Алайда жол толық жабылмайды. Көліктердің жүруі жолдың бір жағымен екі бағытта да ұйымдастырылады.
Қала билігі тұрғындар мен елорда қонақтарына жол жүру бағытын алдын ала жоспарлауға кеңес берді.
Сондай-ақ жүргізушілерден уақытша қолайсыздықтарға түсіністікпен қарап, жол қозғалысын ұйымдастырудағы өзгерістерді ескеруді сұрады.
Мамандардың айтуынша, бұл шаралар көлік кептелісін азайтуға және жөндеу жұмыстарын қауіпсіз жүргізуге мүмкіндік береді.