Вандалдар Қапам ата жартас мешітінің сыртқы келбетін өзгерткен
Маңғыстау облысының Түпқараған ауданында белгісіз біреулер тарихи нысанға пластик терезелер мен есік орнатып, Қапам ата жартас мешітінің сыртқы келбетін өзгерткен. Бұл туралы Azattyq Rýhy агенттігі Lada.kz-ке сілтеме жасап хабарлайды.
Өңір әкімдігі болған оқиғаны вандализм актісі деп атап, қатысы бар адамдарды іздестіруді бастады. Маңғыстау облысының мәдениет, тілдерді дамыту және архив ісі басқармасынан хабарлағандай, ескерткіштің жартастағы үңгірлерінің бірі қышпен қаланып, оған пластик терезе орнатылған. Заң бұзушылық 2025 жылдың желтоқсанында анықталды.
Қапам ата жартас мешіті Таушық ауылынан солтүстік-батысқа қарай 22 шақырым жерде орналасқан және XIX ғасырға жатады. Нысан өңірдегі сопылық және дәстүрлі діни тәжірибелермен байланысты жерасты ғибадат ғимараты болып саналады. Мешіт жұмсақ тау жынысынан қашалып жасалған және шөлді-далалық аймақтағы тік жартастың қиясында орналасқан.
Мәдениет басқармасының мәліметінше, 2025 жылдың жазында мамандар нысанды мемлекет қорғауындағы ескерткіштер тізіміне енгізу үшін оған тарихи-мәдени сараптама жүргізген. Тексеру кезінде мешіт өзінің алғашқы келбетін сақтап қалған және тарихи-мәдени мұра нысаны деп танылған еді. Алайда, бірнеше айдан кейін ескерткіштің сыртқы көрінісі айтарлықтай өзгеріске ұшыраған. Ведомство белгісіз адамдардың бұл әрекеті тарихи нысанға үлкен нұқсан келтіргенін атап өтті.
Іс бойынша материалдар Түпқараған ауданының әкімдігі мен полицияға жіберілді. Билік кінәлі тұлғаларды мешітті өз қаражаты есебінен қалпына келтіруге міндеттеуді көздеп отыр. Қазірше бұл іске қатысы бар адамдарды анықтау мүмкін болмағандықтан, пластик терезелер мен есік әлі де орнында тұр.
Сонымен қатар, заң бұзушыларға ҚР ӘҚБтК-нің 145-бабы (Тарихи-мәдени мұра объектілерін қорғау және пайдалану туралы заңнаманы бұзу) бойынша жауапкершілік қаупі төнуі мүмкін. Айыппұл көлемі 10-нан 200 АЕК-ке дейінгі аралықты құрайды.