Сот шешімімен оған бірнеше жаза түрі қолданылды
Ақтөбе облысында Тәжікстан Республикасының 48 жастағы азаматы өзге адамның құжатын пайдаланып, мемлекеттік шекараны заңсыз кесіп өтпек болған жерінде қолға түсті, деп хабарлайды Azattyq Rýhy Диапазонға сілтеме жасап.
Мәлімет бойынша, бұл азамат Қазақстан аумағында уақытша тұрып жатқан және әрі қарай Ресей Федерациясына шығуды жоспарлаған. Алайда көрші елге кіруге ресми түрде тыйым салынғандықтан, ол шекарадан заңды жолмен өте алмаған. Тығырықтан шығу үшін шетелдік азамат өзінің туған бауырының төлқұжатын пайдаланып, шекаралық бақылаудан алдап өтпекші болады.
Шекара қызметінің қызметкерлері құжаттағы сурет пен келушінің бет-әлпеті сәйкес келмейтінін бірден байқап, заң бұзушыны ұстады. Көп ұзамай іс материалдары сотқа жолданды.
Сот отырысы Ақтөбе облысының Қарғалы ауданында өтті. Істі қарау қорытындысы бойынша, сот шетелдікті мемлекеттік шекараны заңсыз кесіп өтуге әрекет жасағаны үшін кінәлі деп таныды.
Сот шешімімен оған бірнеше жаза түрі қолданылды. Атап айтқанда, 865 мың теңге көлемінде әкімшілік айыппұл салынды. Сонымен қатар, ел аумағынан мәжбүрлі түрде шығарып жіберу туралы шешім қабылданды.