Ковид-таксидің бригадасы жүргізуші мен фельдшерден тұрады
Денсаулық сақтау басқармасының мәліметінше, COVID-такси қызметі ел бойынша бірінші рет Атырау облысында ұйымдастырылып отыр. Әзірге ковид-такси түнгі кезекте қызмет көрсетіп жатыр. Алдағы уақытта аталмыш такси санын көбейту жоспарланған.
Атырау облыстық жедел жәрдем қызметі стансасы директорының міндетін атқарушы Наргиз Баймолдаеваның айтуынша, қазіргі уақытта жедел жәрдем қызметіне түсіп жатқан шақыртулар өте көп. Пандемия басталғалы бері Атырауда жедел жәрдем шақырту көбейген. Бұрын тәулігіне 700-800 рет шақырған болса, қазіргі жағдайда облыс бойынша шақыру саны тәулігіне 1300-ге дейін артқан.
«Ковид-такси қызметі жұмысты жеңілдетуге әсер етіп отыр. Ковид-такси толыққанды бригадамен тең дәрежеде медициналық қызмет көрсете алады. Коронавирус, пневмонияға шалдыққандармен бірге, қызуы көтеріліп тұрған науқастардың шақыртуына да барады. Егер коронавирусқа шалдыққан науқас дәрігердің қабылдауынан шығып, үйіне жете алмай тұрса, ковид-такси қызметін пайдалана алады. Ковид-таксидің бригадасы жүргізуші мен фельдшерден тұрады. Өкінішке қарай, біздің де қызметкерлеріміздің арасында науқастанып жатқандар бар. Қазіргі уақытта қолда бар күшті максималды түрде тиімді пайдалануға тырысып отырмыз», - дейді Атырау облыстық жедел жәрдем қызметі стансасы директорының міндетін атқарушы Наргиз Баймолдаева.
Атап өтетін бір жайт, COVID-такси жүргізушілері қажет жағдайда алғашқы медициналық көмек көрсете алады. Олар базалық реанимациялық көмек бойынша оқытудан өткен.
Сонымен бірге, пневмония, коронавирусқа шалдыққан науқастар ковид-такси қызметін дәрі-дәрмек тасымалы үшін де пайдалана алады.