Әулиекөлде мал жайып жүрген ер адам адасып кетті: оны іздеуге дрон, спутниктік байланыс қолданылды
Қостанай облысында ТЖМ құтқарушылары жоғалған малшыны тапты
Әулиекөл ауданында құтқарушылар жылқы жайып жүрген кезде жоғалып кеткен ер адам іздеп тапты. 14 наурызда ол Москалевка ауылынан шыққан, алайда қалың тұман салдарынан далада жоғалтып, одан кейін байланыс үзіліп қалған, деп хабарлайды Azattyq Rýhy.
Іздеу жұмысында ТЖД құтқарушылары, полиция қызметкерлері, жергілікті атқарушы органдар өкілдері және ауыл тұрғындары жұмылдырылды. Арнайы техника, дрон және спутниктік байланыс қолданылды.
Түнде құтқарушылар жоғалған адамның атын тауып, іздеу аймағын қысқартуға мүмкіндік алды. 16 наурыз таңертең ер адам екі елді мекеннің арасында ашық жерде табылды. Оған медициналық көмек қажет болған жоқ.
«Құтқарушылар тұрғындарға дала аймақтарына шығар алдында ауа райы жағдайын ескеруді, өздерімен бірге байланыс және навигация құралдарын алып жүруді, сондай-ақ қозғалыс бағыты туралы жақындарына алдын ала хабарлауды еске салады», – делінген ҚР ТЖМ хабарламасында.
Көп оқылған
