Танкер терминалға кіруге рұқсат күтіп тұрған сәтте «белгісіз нысанның» шабуылына ұшыраған
Грекияның «Maran Homer» мұнай танкері Қара теңізде шабуылға ұшырады. Бұл туралы бұған дейін Reuters агенттігі кемені басқаратын Maran Tankers компаниясына сілтеме жасап мәлімдеді, деп хабарлайды Azattyq Rýhy.
Агенттік мәліметінше, танкер Новороссийскідегі Каспий құбыр консорциумы (КҚК) терминалына кіруге рұқсат күтіп тұрған кезде «белгісіз нысанның» шабуылына тап болған.
Қазақстан Республикасы Энергетика министрлігі аталған оқиғаға қатысты түсініктеме берді.
«Оқиға болған сәтте танкердің бортында қазақстандық мұнай болмаған. Қазақстан Республикасының экспорттық шикізатына шығын келтірілген жоқ», – деді министрдің кеңесшісі, Энергетика министрлігінің ресми өкілі Әсел Серікбаева.