«Аңсаған сәби»: Қазақстанда ЭКО арқылы 11 мың бала дүниеге келді

Қазақстанда мыңдаған отбасыға бала сүю бақытын сыйлаған «Аңсаған сәби» бағдарламасының бесжылдық қорытындысы жарияланды. Президент тапсырмасымен қолға алынған жоба аясында ел демографиясына елеулі үлес қосылды, деп хабарлайды Azattyq Rýhy. 

Квота саны 7 есе артты

2021 жылы басталған бағдарлама бедеулік мәселесімен бетпе-бет келген жұптар үшін нақты көмек тетігіне айналды. Мемлекет тарапынан көрсетілетін қолдаудың ауқымы жыл өткен сайын кеңейіп келеді.

Міндетті әлеуметтік медициналық сақтандыру (МӘМС) жүйесі арқылы бөлінетін жыл сайынғы квота саны 7 есе көбейді.

Қазіргі уақытта жылына 7 мыңға жуық отбасы тегін ЭКО процедурасын жасатуға мүмкіндік алып отыр.

Бес жылдың нәтижесі

«Аңсаған сәби» бағдарламасы тек қағаз бетіндегі жоба емес, мыңдаған қазақстандықтың тағдырын өзгерткен бастама болды. 2021-2025 жылдар аралығындағы негізгі көрсеткіштер мынадай:

1. 28 мыңнан астам әйел жасанды ұрықтандыру (ЭКО) процедурасынан өтті.

2. 12 мыңнан астам әйел сәтті емнен кейін жүктілік бойынша есепке тұрды.

3. 11 мыңға жуық сәби осы бағдарламаның арқасында дүние есігін ашты.

Сапа мен бақылау басты назарда

Денсаулық сақтау министрлігі ЭКО қызметін көрсететін медициналық орталықтардың жұмысын жіті қадағалап отыр. Мамандардың айтуынша, тұрақты бақылау медициналық көмектің сапасын арттыруға және МӘМС қаржысын тиімді пайдалануға мүмкіндік береді.

«Бағдарламаның басты мақсаты — әрбір отбасының толыққанды болуына жағдай жасау. Бұл бағыттағы жұмыстар алдағы уақытта да жалғасын табады», — деп атап өтті ведомстводан.