Бұл қала тұрғындарына далада ұзақ жүрмеу ұсынылады
Синоптиктер 2026 жылғы 14 наурызда Қазақстанның бірқатар ірі қаласында қолайсыз метеорологиялық жағдай болатынын ескертті. Ауада зиянды заттардың жиналуына байланысты тұрғындарға далада ұзақ жүрмеу ұсынылады, деп хабарлайды Azattyq Rýhy «Қазгидромет» мәліметіне сілтеме жасап.
Сенбі күні атмосфералық ауаның ластануы келесі қалаларда байқалады: Алматы, Атырау, Орал, Қарағанды, Балқаш, Жезқазған, Теміртау, Астана (түнде).
Бұл қалаларда желсіз ауа райы мен инверсия салдарынан түтін мен өндірістік қалдықтар жерге жақын қабатта жиналып қалады.
Қолайсыз метеорологиялық жағдайлар – бұл штиль (желдің болмауы), әлсіз жел, тұман және инверсия сияқты факторлардың жиынтығы. Мұндай сәтте ауа тазармайды, керісінше, көлік түтіні мен зауыт қалдықтары адам тыныс алатын деңгейде «тұрып» қалады.
Мұндай ауа райы әсіресе созылмалы ауруы бар жандарға ауыр тиюі мүмкін.
Мамандар қолайсыз күндері келесі сақтық шараларын орындауға кеңес береді:
Серуенді шектеу: Ашық ауада, әсіресе ірі автотрассалар мен өндіріс орындарының маңында жүру уақытын азайту керек.
Дәрі-дәрмек: Өкпе, жүрек-қан тамырлары немесе аллергиялық аурулары бар адамдарға қажетті дәрілерін үнемі жанында ұстау ұсынылады.
Белсенділікті азайту: Далада спортпен шұғылданудан уақытша бас тартқан жөн.