Дубай әуежайлары рейстерді біртіндеп қайта іске қосты

Дубайдағы халықаралық әуежайлардың жұмысы ішінара қайта жанданды. Рейстер біртіндеп орындала бастады, деп хабарлайды Azattyq Rýhy.

Dubai Airports мемлекеттік операторының мәліметінше, Дубайдағы екі негізгі әуе айлағы – Дубай халықаралық әуежайы (DXB) мен Әл-Мактум – Дубай Уорлд Централ (DWC) әуежайларында бірқатар рейстер қайта орындала бастаған.

Компания қазіргі уақытта жағдайды тиісті мемлекеттік органдармен бірлесіп тұрақты бақылап отырғанын атап өтті. Соған байланысты әуе қатынасы толық қалыпқа келгенше рейстер кестесінде өзгерістер болуы мүмкін.

Осыған байланысты жолаушыларға әуежайға бармас бұрын өз рейсінің мәртебесін әуе компаниясынан нақтылап алу ұсынылады. Өйткені ұшу кестесі жағдайға байланысты үнемі жаңартылып отырады.

Dubai Airports дерегінше, қауіпсіздік талаптары мен операциялық рәсімдер толық сақталып, әуежай қызметі кезең-кезеңімен қалпына келтіріліп жатыр.

Айта кетейік, бұған дейін Дубай үкіметінің БАҚ кеңсесі қауіпсіздікке байланысты Дубай халықаралық әуежайының жұмысы уақытша тоқтатылғанын хабарлаған болатын. Сарапшылардың есебінше, әуежай жұмысының әр минуты шамамен 1 млн доллар шығын әкеледі.

Қазіргі таңда Дубайда екі халықаралық әуежай жұмыс істейді – DXB және DWC. Рейстердің толық қалпына келуі жағдайдың тұрақтануына байланысты жүзеге асады.