Халықаралық S&P агенттігі Қазақстанның несие рейтингін растады

Халықаралық S&P рейтингтік агенттігі Қазақстанның тәуелсіз несие рейтингін «BBB-» деңгейінде растап, болжамды «позитивті» деңгейінде сақтап қалды, деп хабарлайды Azattyq Rýhy ҚР Ұлттық экономика министрлігіне сілтеме жасап.

Рейтингтің тұрақтылығы мен оң болжамның сақталуына еліміздегі бірнеше маңызды фактор әсер еткен. Агенттік сарапшылары Қазақстан экономикасының мынадай басымдықтарын атап өтті:

• Мемлекеттік қаржыны басқарудағы қатаң тәртіп;
• Ұлттық қордағы жинақтардың жеткілікті деңгейі;
• Шикізатқа тәуелділікті азайту бағытындағы жұмыстар;
• Мемлекеттік басқару тиімділігін арттыру.

«Ұлттық қор қаражатын пайдалану бойынша қатаң фискалдық ережелерді сақтау және мұнайдан тыс салық базасын кеңейту мемлекеттік қаржының тұрақтылығын нығайтуға мүмкіндік береді», — деп атап өтті министрлік өкілдері.

S&P сарапшылары өткен жылы басталған инвестициялық бағдарламаға оң баға берді. Соңғы деректерге сәйкес, Қазақстан экономикасында тарихи бетбұрыс байқалуда. 

1. «Бәйтерек» холдингінің басым секторлардағы жобалары инвестициялардың ІЖӨ-ге қатысты деңгейін жоғары ұстап тұр.

2. Өңдеу өнеркәсібінің үлесі екінші жыл қатарынан тау-кен саласынан асып түсті.

3. 2025 жылдың қорытындысы бойынша өңдеу өнеркәсібінің ІЖӨ-дегі үлесі 12,7%-ға дейін өсті.

Министрліктің мәліметінше, Қазақстанның сыртқы қарызының қалыпты деңгейі және шетел валютасындағы активтердің қоры еліміздің нетто-кредитор мәртебесін сақтауына жағдай жасайды. Сонымен қатар, халықаралық сарапшылар Қазақстан үшін екінші деңгейлі санкциялардың тәуекелі төмен екенін алға тартты.