СҚО дәріханаларында антибиотиктер екі есе қымбат сатылған

Солтүстік Қазақстан облысы бойынша Экономикалық тергеу департаменті мамандары өңірде дәрі-дәрмек бағасын негізсіз қымбаттату және заңсыз сату деректерін анықтады. Бұл туралы Қаржы министрлігінің Қаржы мониторингі комитеті хабарлады.

Экономикалық тергеу департаменті мен Криминалды полиция бірлесіп жүргізген рейдтік шаралары барысында бағаны көтерген дәріханалардың жолы кесілсе, дәріні рұқсатсыз сатқан алыпсатарлар тергеуге алынды.

«​Жедел іс-шараларды өткізу нәтижесінде вирусқа қарсы «Ингавирин» дәрісінің бір қаптамасыз 6500 теңгеден және антибиотик «Азитромицинді» бір қаптамасын 2500 теңгеден бақылаудағы сатып алу жүзеге асырылған», - делінген аталған хабарламада.

​ ҚР Денсаулық сақтау министрінің «Бөлшек және көтерме саудада өткізу үшін дәрілік заттың саудалық атауына шекті бағаларды бекіту туралы» 2019 жылғы 15 шілдедегі № ДСМ-104  бұйрығына сәйкес, «Ингавирин» препаратын сатудың шекті құны 5640 теңгені, ал «Азитромицин» препараты 1217 теңгені құрайды.