Павлодарда ҚТЖ-ның екі басшысы пара бопсалағаны үшін 7 жылға сотталды

Павлодар қаласында ұлттық «Қазақстан темір жолы» компаниясы филиалының екі басшысына қатысты сот үкімі шықты. Олар мердігер ұйымнан пара бопсалады деп танылды, деп хабарлайды Azattyq Rýhy агенттігі Irbistv-ге сілтеме жасап.

Қылмыстық іс материалдары Павлодар қаласының қылмыстық істер жөніндегі ауданаралық сотында қаралды.

Екі айыпталушы да 7 жылға бас бостандығынан айырылды. Сонымен қатар, оларға мемлекеттік қызметте өмір бойы лауазым атқаруға тыйым салынды.

Тергеу мәліметінше, магистральдық желі бойынша Павлодар бөлімшесінің басшысы мен «ҚТЖ» дистанциясының бастығы 2025 жылдың ақпан-сәуір айлары аралығында Ақсу-1 стансасында электрмонтаж жұмыстарын жүргізген мердігерден жүйелі түрде ақша бопсалаған.

Лауазымды тұлғалар сыйақы үшін:

• орындалған жұмыстар актілеріне қол қоюға,
• көрсетілген қызметтерді кедергісіз қабылдауға уәде берген.

Алынған қаражаттың жалпы сомасы 2,7 миллион теңгені құраған.

Павлодар қаласының қылмыстық істер жөніндегі ауданаралық сотының судьясы Думан Серікбаевтың айтуынша, сотталғандардың кінәсі дәлелдемелер жиынтығымен толық расталған.

Кінә қылмыстық іс материалдарымен, жасырын тергеу әрекеттерінің нәтижелерімен, сондай-ақ сот талқылауы барысында және сотқа дейінгі тергеу кезеңінде алынған куәгерлердің айғақтарымен дәлелденді.

Сонымен қатар, сот магистральдық желі бойынша Павлодар бөлімшесінің басшысына қатысты 2021 жылғы эпизодты да ескерді. Тергеу нұсқасына сәйкес, ол кезде ол бағынышты қызметкерінен құны 57 мың теңге тұратын кеңсе орындығын алған.

Аталған үкім әзірге заңды күшіне енген жоқ және заңда белгіленген тәртіппен апелляциялық тәртіпте шағымдануға жатады.