Алматыда бір тәуліктен бері тоқтаусыз қар жауып жатыр
Алматыда бір тәуліктен бері тоқтаусыз жауған қар қала тіршілігіне өзгерістер енгізді. Кей аудандарда қардың қалыңдығы 49 сантиметрге дейін жеткен. Қазіргі уақытта коммуналдық қызметтер күшейтілген режимде жұмыс істеп жатыр, деп хабарлайды Azattyq Rýhy Алматы әкімдігіне сілтеме жасап.
Синоптиктердің мәліметінше, жауын-шашын 16 қаңтар таңертең басталып, үзілістермен 18 қаңтар таңына дейін жалғасады деп болжануда. 17 қаңтардағы жағдай бойынша қаланың әртүрлі бөліктеріндегі көрсеткіштер келесідей:
Қар жауа бастаған алғашқы сағаттардан бастап қала тазалығына жауапты мамандар тәулік бойғы жұмысқа көшті. Қазіргі уақытта көшелерді тазартуға 2,8 мыңнан астам жол жұмысшысы; 1250 бірлік арнайы техника жұмылдырылды.
Жол қауіпсіздігін қамтамасыз ету үшін 75 жедел бригада құрылып, олар ең алдымен жол айрықтарын, беткейлер мен көпірлерді көктайғаққа қарсы реагенттермен өңдеп жатыр. Қазірдің өзінде магистральдардан 3 мың текше метрден астам қар шығарылды.
Арнайы шағын техника тротуарлар мен қоғамдық кеңістіктерді тазаласа, аялдамалар, жерүсті өткелдері, баспалдақтар мен пандустарды мамандар қолмен тазалап жатыр. Басымдық қоғамдық көлік бағыттарына, ауруханалар мен мектептерге баратын жолдарға берілген.
«Қардың астындағы мұздың еріп, қайта қатуына байланысты кей жерлерде тайғақ пайда болуы мүмкін. Сондықтан жолдарды алдын ала реагенттермен өңдеу жұмыстары тоқтаусыз жүргізілуде», — деп түсіндірді ведомство өкілдері.
Қала билігі автокөлік иелерінен көліктерін жол жиегіне қалдырмауды сұрайды. Бұл арнайы техниканың кедергісіз жұмыс істеуіне және көшелерді сапалы тазалауға мүмкіндік береді. Сондай-ақ, қашықтықты сақтап, жазғы дөңгелекпен жолға шықпау ескертіледі.