Актөбе мен Қызылорда өңірлерінде ауыр жүк және қоғамдық көлік қозғалысына шектеу қойылды
Қазақстанның екі өңірінде ауа райының күрт нашарлауына байланысты республикалық маңызы бар автожолдар уақытша жабылды, деп хабарлайды Azattyq Rýhy
10 қаңтар күні сағат 21:45-тен бастап боран мен көктайғақтың күшеюіне байланысты Ақтөбе және Қызылорда облыстарында жүк көліктері мен қоғамдық көліктің қозғалысына шектеу қойылды.
Ақтөбе облысында «Ресей шекарасы – Марток – Ақтөбе – Қарабұтақ – Қызылорда – Шымкент – Тараз – Қордай – Алматы – Қорғас – Қытай шекарасы» тасжолының 965-1240 шақырым аралығы, яғни Қарабұтақ ауылынан Қызылорда облысының шекарасына дейінгі бөлігі жабылды.
Ал Қызылорда облысында осы бағыттағы жолдың 1240-1362 шақырым аралығы — Ақтөбе облысының шекарасынан Арал қаласына дейінгі аумақта көлік қозғалысы уақытша тоқтатылды.
«ҚазАвтоЖол» ұлттық компаниясының мәліметінше, жолдарды қайта ашу 11 қаңтар күні таңғы сағат 07:00-ге жоспарланып отыр.
Мамандар жүргізушілерге ауа райы жақсарғанша алыс жолға шықпауға, қауіпсіздік талаптарын қатаң сақтауға және ресми дереккөздерден ақпаратты тұрақты қадағалап отыруға кеңес береді.