Танысын бопсалап, ақша талап етті деп айыпталған: Қарағанды облысының тұрғыны ақталып шықты

Қарағанды облысының қылмыстық істер жөніндегі мамандандырылған ауданаралық соты қорықытып алу  бойынша С-ға қатысты қылмыстық істі қарады (ҚК 194-бабының 4-бөлігінің 2-тармағы), деп хабарлайды Azattyq Rýhy.

Қылмыстық қудалау органдарымен С. А.-дан оны масқаралайтын мәліметтерді тарату қаупін төндіріп, ірі мөлшерде ақша сомасын талап еткен. Осы мақсатта С.-ның өтініші бойынша оның танысы У. әртүрлі абоненттік нөмірлерден А.-ға ақша талап еткен хабарламалар жіберген.

Дәлеледерді зерттеу қорытындысы нәтижесінде не анықталды:

1. С. жәбірленушіден қандай да бір ақша талап етпеген. Оның тарапынан айыптауды растайтын хат-хабар, қоңыраулар немесе басқа да деректер анықталмаған. Мұны сот мобильді компанияларға қосымша сұрау салу, телефон байланыстары мен абоненттердің орналасқан жері туралы салыстыру, компьютерлік технологиялар саласындағы мамандардан жауап алу арқылы тексерді.

2. Жәбірленушіге хабарламалар жіберілген ұлының телефонына қатысты куә У.-дың айғақтары қарама-қайшы және тұрақсыз. Оның көрсетулері басқа куәлардың, мамандардың, жасырын тергеу әрекеттерінің материалдарының және телефон қосылымдарының детализациясымен сәйкес келмейді. Сонымен қатар, куә мәртебесінде бола отырып, У. қылмыстық жауаптылықтан жалтаруға мүдделі.

«ҚПК-нің 19-бабына сәйкес айыптау үкімі болжамдарға негізделе алмайды және ол жол берілетін және анық дәлелдемелердiң жеткiлiктi жиынтығымен расталуға тиiс.

Мұндай дәлелдемелерді айыптаушы тарап ұсынбаған. Жоғарыда айтылғандардың негізінде, сот үкімімен С. ҚК-тің 194-бабының 4-бөлігінің 2) тармағы бойынша кінәсіз деп танылды және қылмыстық құқық бұзушылық жасауға қатысқаны дәлелденбегені үшін ҚПК-нің 394-бабының 2-бөлігінің 3) тармағының негізінде ақталды.

Бұлтартпау шарасы ретінде қолданылған қамауда ұстау шарасы күшін жойды, С. сот залында дереу қамаудан босатылды», – делінген облыстық сот хабарламасында.

Қылмыстық процесті жүргізетін органдардың заңсыз әрекеттерінен келтірілген зиянды оңалту және өтеу құқығы ҚПК-нің 4-тарауының тәртібімен танылды.