Ертең кейбір жүргізушілерге айыппұл салынуы мүмкін

Ертең, 1 желтоқсаннан бастап Қазақстанда қысқы шина маусымы ресми түрде басталады, ал жазғы шинамен жүргендерге айыппұл салынуы мүмкін, деп хабарлайды Azattyq Rýhy.

Қазақстан Республикасының Әкімшілік құқықбұзушылық кодексінде маусымға сәйкес келмейтін шиналар үшін 5 АЕК көлемінде айыппұл қарастырылған, ал жыл ішінде осындай құқықбұзушылық қайталанса, айыппұл көлемі 20 АЕК-ке дейін артады.

Ұзаққа созылған күз және қардың болмауы шинаны ауыстыруды кешіктіруге себеп емес, өйткені жазғы резина суықта қатайып, жолмен үйкеліс нашарлайды.

«Доңғалақты көлік құралдардың қауіпсіздігі туралы» техникалық регламентке сәйкес, жазғы шинадағы протектор биіктігі кемінде 1,6 мм, қысқыда 4 мм болуға тиіс.

Доңғалақта тау шыңы және қар ұшқыны белгісі таңбалануы керек, сондай-ақ «M+S», «M&S» және «M S» маркалары болуы міндетті.

Егер барлық мезгілге арналған шиналарда осы маркалар болса, қыс кезінде оларды пайдалануға болады. Олай болмаған жағдайда мұндай шинаны қолдануға тыйым салынады.