Маңғыстауда психиатриялық ауруханаға түскен сарбаз запасқа шығарылды
Осы факті бойынша тексеріс басталды
Маңғыстау облысында мерзімді әскери қызметші психиатриялық ауруханаға түскеннен кейін запасқа шығарылды. Оның әскердегі заңсыздықтар туралы арызы бойынша қылмыстық іс қозғалды, деп хабарлайды Azattyq Rýhy Lada.kz-ке сілтеме жасап.
Бұл ақпаратты Ақтау гарнизонының баспасөз қызметі растады. Ведомствоның мәліметінше әскери қызметші психикалық ауытқу белгілері байқалғанын айтып, шағымданғаннан кейін медициналық тексеріске жіберілген.
«Мамандар оны әскери қызметті әрі қарай атқаруға жарамсыз деп таныды, осыған орай ол денсаулық жағдайына байланысты запасқа шығарылды», — делінген хабарламада.
Бұрынғы сарбаз әскердегі заңсыз әрекеттер туралы айтқан. Аталған фактілер бойынша қылмыстық іс қозғалып, оны құзырлы органдар тергеп жатыр. Қарулы күштердің басшылығы жағдайды бақылауда ұстап отырғанын хабарлады.
Еске сала кетсек, Маңғыстау облысында 18 жастағы сарбаз әскерден психиатриялық ауруханаға түскен еді. Туыстары мұны әлімжеттікпен байланыстырады. Бұл оқиғаға қатысты Құрлық әскерлері түсініктеме берген болатын.
