H5 вирусының мутациясы жаңа, аса қауіпті пандемияны тудыруы ықтимал
Құс тұмауы вирусы адамзат үшін коронавирустан да қауіпті болуы мүмкін. Бұл туралы Франциядағы Пастер институтының Тыныс жолдары инфекциялары орталығының директоры Мари-Анн Рамей-Вельти мәлімдеді, деп хабарлайды Azattyq Rýhy Gazeta.ru-ға сілтеме жасап.
Ғалымның айтуынша, жоғары патогенді H5 вирусы соңғы жылдары жүздеген миллион құстың жаппай жойылуына, азық-түлік жеткізу тізбегінің бұзылуына және бағаның өсуіне себеп болды. Адамдардың бұл вирусты жұқтыру жағдайы сирек кездеседі, дегенмен бұл вирус сүтқоректілерге бейімделіп, адамнан адамға тарала бастаса, үлкен қауіп төндіреді.
Рамей-Вельти атап өткендей, адамдарда H5 вирусына қарсы иммунитет жоқ. Дәл COVID-19 кезіндегідей вирус балаларды қоса алғанда, дені сау адамдарға да әсер етуі мүмкін. Оның пікірінше, құс тұмауы пандемиясы коронавирус пандемиясынан да ауыр болуы ықтимал.
H5 вирусын қазірдің өзінде адамдар жұқтырған. Биылғы қараша айында Вашингтон штатында алғаш рет бұл вирустың H5N5 штаммын жұқтырған науқас қайтыс болды.
Дегенмен сарапшылардың айтуынша, әлем ықтимал құс тұмауы пандемиясына COVID-19-ға қарағанда жақсырақ дайындалған: вакцинаға кандидаттар, вирусқа қарсы препараттардың қоры және оларды тез өндіру технологиялары бар.
«Әзірге адамдар арасында жаһандық пандемия қаупі төмен күйінде қалып отыр. Алаңдауға себеп жоқ – табиғатта серуендеуге, тауық еті мен жұмыртқаны тұтынуға болады», - деді Дүниежүзілік жануарлар денсаулығы ұйымының ғылыми бөлім басшысы Грегорио Торрес.