Бұл әлем бойынша шамамен 6 мыңға жуық Airbus A320 типті ұшақтарға қатысты мәселе
Air Astana және FlyArystan әуе компанияларына тиесілі Airbus ұшақтарының бағдарламалық жасақтамаларын жаңарту жұмыстары осы сенбінің соңына дейін аяқталады. Бұл туралы Көлік министрлігінің Азаматтық авиация комитеті мәлімдеді, деп хабарлайды Azattyq Rýhy.
Бұл шұғыл жаңарту Еуропалық авиация қауіпсіздігі агенттігі (EASA) 2025 жылғы 28 қарашада шығарған Шұғыл ұшу жарамдылығы директивасына (AD) сәйкес жүргізілуде. Бұл директива 29 қарашада күшіне енді.
Директива Airbus A320 ұшағымен болған оқыс оқиғадан кейін шығарылды. Оқиға кезінде автопилот қосулы тұрғанда, ұшақтың төмендеуімен бірге биіктік рөлінің өздігінен қысқа мерзімге істен шығуы тіркелген.
EASA-ның бұл директивасы дереу және міндетті сипатқа ие. Ол күшіне енген сәттен бастап, Airbus A319/A320/A321 отбасыларының барлық операторлары келесі ұшуға дейін Airbus нұсқауларын орындай отырып, биіктік рөлін басқару блоктарының бағдарламасын ауыстыруға немесе өзгертуге міндетті.
Бұл әлем бойынша шамамен 6 мыңға жуық Airbus A320 типті ұшақтарға қатысты мәселе.
29 қараша таңертеңгі жағдай бойынша, Air Astana әуе компаниясының инженерлік қызметі 18 ұшақта бағдарламалық қамтамасыз етуді сәтті жаңартты.
Air Astana және Fly Arystan тобында бүгінде 38 Airbus типті ұшақ ұшады, оның бес бортында жаңарту қажет емес.
Жоспарлы немесе жоспардан тыс техникалық қызмет көрсетуде тұрған ұшақтарда директива тиісті техникалық қызмет көрсету аяқталғанға дейін орындалады. Комитет жаңарту жұмыстарын 2025 жылғы 29 қарашаның соңына дейін толық аяқтауды жоспарлап отыр.
Бағдарламалық қамтамасыз етуді міндетті түрде жаңартуға байланысты Air Astana және FlyArystan ұшақтарының ұшулары базалық әуежайларда кешіктірілді.
Дегенмен, Астана және Алматы халықаралық әуежайлары қазіргі уақытта штаттық режимде жұмыс істеп тұр.