Жеңіл көлік пен КамАЗ соқтығысты
Астана – Петропавл тас жолында Hyundai мен КамАЗ соқтығысып, бір жасөспірім көз жұмды, деп хабарлайды Azattyq Rýhy Nayza kokshe-ге сілтеме жасап.
26 қыркүйек күні сағат шамамен кешке қарай Астана – Петропавловск бағытындағы тас жолдың 289-шақырымында ауыр жол апаты тіркелді. Hyundai Santa Fe маркалы жеңіл көлік пен КамАЗ-55111 жүк көлігі соқтығысқан.
Салдарынан 16 жастағы қыз ауыр жарақат алып, жедел жәрдем көлігінде көз жұмды.
Жеңіл көлікте болған 65 жастағы әйел түрлі дене жарақаттарымен ауруханаға жеткізілді.Қазір дәрігерлер оның жағдайын бақылап отыр.
Полиция бұл факті бойынша сотқа дейінгі тергеуді бастағанын хабарлады. Құқық қорғаушылар жүргізушілерге жол ережесін қатаң сақтап, жылдамдықты асырмауға және көліктердің техникалық жағдайын үнемі тексеруге кеңес берді.
Мамандардың айтуынша, күз мезгілінде тас жолдарда көлік апаттары жиілейді. Бұған ауа райының қолайсыздығы (тұман, жаңбыр, көктайғақ); жүргізушілердің шаршауы; жылдамдықты асыру себеп болады.
«Әрбір жүргізуші жолға шыққанда тек өз өміріне емес, жолаушылар мен басқа көлік жүргізушілерінің қауіпсіздігіне де жауапты екенін ұмытпауы керек», – деп атап өтті полиция департаменті.