«Бекет атаға зиярат етуге бара жатқан»: 10 адамның өмірін қиған апаттың жай-жапсары анықталды

Ішкі істер министрлігі 10 адамның өмірін қиған жол апатына байланысты үндеу жасады, деп хабарлайды Azattyq Rýhy.

Ведомствоның мәліметінше ішкі істер министрінің тапсырмасымен жедел штаб құрылды. Штаб тәулік бойы жұмыс істейді.

«Министр қылмыстық істің тергеу барысын өз бақылауына алды. Қазіргі уақытта тергеу аясында жүргізушінің іс-қимылы, көліктің техникалық жағдайы, маршрут және тасымалдау шарттары тексерілуде», - деді ІІМ ресми өкілі Шыңғыс Алекешев.

Жолаушылар қасиетті Бекет атаға зиярат етуге шыққаны анықталды. Барлығы Қазақстан азаматы, әртүрлі өңірлерден келген. Зардап шеккендер ауруханаға жеткізілді, оларға барлық қажетті медициналық көмек көрсетіліп жатыр.

Ішкі істер министрлігі әкімдіктер мен профильді мемлекеттік органдармен бірлесе отырып, қаза тапқандар мен зардап шеккендердің отбасыларына кешенді көмек ұйымдастыруда, соның ішінде:

• қаза тапқандардың денесін өңірлерге жеткізу;
• туыстарымен тұрақты байланыс орнату;
• жерлеу рәсімін ұйымдастыруға көмек көрсету;
• заң аясында сақтандыру және ұйымдастырушылық мәселелерді шешуге қолдау көрсету.

Туыстарына барлық ақпарат дереу беріліп отырады.

«Ішкі істер министрлігі қаза тапқандардың туыстары мен жақындарына қайғырып көңіл айтады. Сонымен қатар барлық жүргізуші мен тасымалдауды ұйымдастырушыларды жолда қауіпті жағдай тудырмас үшін шаршаған күйде рөлге отырмауға, көлікке артық жүк салмауға шақырамыз. Шаршаған жүргізушінің өзі үлкен апатқа себеп болуы мүмкін», - деді Шыңғыс Алекешев.