Қазақстанда меморгандармен соттасқан қарапайым халықтың 60 пайызы істі жеңіп шыққан

Қазақстан бойынша азаматтар мен кәсіпкерлердің мемлекеттік органдарға қарсы істерде 60 пайызға дейін жеңіске жететінін көрсетіп отыр. Бұл туралы бүгін Конституция күніне орай сөз сөйлеген президент Қасым-Жомарт Тоқаев мәлім етті, деп хабарлайды Azattyq Rýhy.

Президент заң үстемдігін қамтамасыз ететін аса маңызды институт – Конституциялық сот туралы айта келе 2 жарым жыл ішінде бұл органның қарауына 11 мыңнан астам өтініш түскенін айтты.

«Әкімшілік рәсімдік-процестік кодексті енгізу нәтижесінде азаматтардың мемлекетпен жария-құқықтық қатынастарын реттеу тәсілдері түбегейлі жаңарды. Кодекстегі жаңа новеллалар арқылы соттардың тек мемлекет мүддесін қорғауға бағдарланған әдепкі ұстанымы жақсы жағына өзгерді. Сот үкімінде субъективтілік азайып, анағұрлым әділетті шешімдер шығарыла бастады», - дейді ол.

Бұл сөзіне дәлел ретінде президент бұрын соттар көбіне айыптау үкімін шығарса, қазір меморгандармен соттасқан азаматтардың көбі істі жеңіп шығатынын хабарлады.

«Қазіргі статистика азаматтар мен кәсіпкерлердің мемлекеттік органдарға қарсы істерде 60 пайызға дейін жеңіске жететінін көрсетіп отыр. Бұрын азаматтар іске қатысты шағымдану мүмкіндігі жоқтығына жиі арызданатын. Сондықтан кассациялық соттарды құру және биылғы 1 шілдеден бастап «жаппай» кассация қағидатын енгізу Қазақстанның сот жүйесін жаңғыртудағы маңызды қадамдардың бірі болды», - дейді Тоқаев.

Сондай-ақ, президент еске салғандай, елімізде Адам құқықтары жөніндегі уәкіл конституциялық мәртебеге ие болды. Еліміздің барлық аймағында өкілдіктері ашылды. Енді Уәкілдің тәуелсіздігі мен иммунитетіне Ата заң кепілдік береді. Бұдан бөлек, Омбудсмен Бас прокурор сияқты Конституциялық сотқа жүгіну құқығына ие болды.