Абай облысында жас «закладчик» есірткіні 15-тегі оқушы қыздың сөмкесіне тығып қойған (ВИДЕО)

Ішкі істер министрлігі жасөспірімдердің есірткі саудасына араласып жатқанына алаңдап, ата-аналарға үндеу жолдады, деп хабарлайды Azattyq Rýhy.

Жыл басынан бері есірткі қылмысына қатысты 49 жасөспірім анықталған екен. Полиция жасөспірімдердің күнделікті мінез-құлқы көп нәрседен хабар береді дейді.

«Тамыз айының өзінде ғана есірткі қылмысына қатысты 6 факт тіркелді, соның ішінде бір бала есірткі тұтынғаны үшін қолға түсті. Мысалы, Абай облысындағы колледждердің бірінде оқитын 16 жастағы студент пен оның 15 жастағы құрбысы ұсталды. Қыз бала әлі мектепте оқиды. 16 жастағы «закладчик» есірткіні алып өту үшін оны оқушы қыздың сөмкесіне тығып қойған», - деп хабарлайды полиция.

Полиция ата-аналарға баласының мінез-құлқын бақылап, олармен жиі сөйлесіп тұруға шақырады. Айта кетейік, есірткі таратқандар жасына қарамай 5 жылдан 20 жылға дейін сотталады.